മാറ്റത്തിനു വേണ്ടി

രാത്രിയില്‍ മെഴുകുതിരി കത്തിച്ച്

ഇരുട്ടിനുവേണ്ടി പ്രാര്ത്ഥിച്ചത്

വിരുന്നു വരുന്ന ഇയ്യാംപാററകളുടെ

കൂടെ നൃത്തം ചെയ്യാനായിരുന്നു .

മറ്റൊരു വിളക്ക് നിന്റെ കണ്ണുകളില്‍

കത്തുന്നത് കാണാനായിരുന്നു.

പിന്നെ കണ്ണുമടച്ചുകിടന്നു

വായിച്ചുകൊണ്ടിരിക്കുന്ന പുസ്തകം

മാറില്‍ കമിഴ്ത്തി വെച്ച് അതിലെ

കഥാപാത്രങ്ങളോടൊത്ത്

പുസ്തകത്താളുകള്‍ക്കിടയില്‍

ഊരുതെണ്ടാനിറങ്ങാനായിരുന്നു....

പണ്ട് നീലപ്പൂക്കള്‍ മാത്രം

വിരിയിച്ച ഉത്തരക്കടലാസുകളില്‍

ചോരപ്പൂക്കള്‍ വിരിയിച്ചത്

രണ്ടാമതാവാറുള്ള കൂട്ടുകാരിയെ

ഒന്നാമതാക്കിയത് എല്ലാം ഒരു

മാറ്റത്തിനു വേണ്ടിയായിരുന്നു.

ഇന്ന് നടുക്കടലില്‍ പങ്കായം

വലിച്ചെറിഞ്ഞ് ഞാനിരിക്കുന്നു.

കുത്തൊഴുക്കില്‍ പെടുമ്പോഴാണല്ലൊ

പിടിവള്ളികളെ നാം തിരിച്ചറിയുന്നത്.

ശവം തീനികളെയും.......